د عدن د امنیتي ادارې رسنیز دفتر اعلان وکړ چې د چهارشنبې په سهار وختي، د حوثیانو له خوا توغول شویو دوو توغندیو په یمن کې د عدن نړیوال هوايي ډګر په نښه کړی دی. د دې راپور له مخې، د احتمالي مرګ ژوبلې په اړه کوم خبر نه دی خپور شوی.
رویټرز خبري اژانس راپور ورکړی چې د عدن نړیوال هوايي ډګر د یمن د هغو برخو لپاره چې د حوثیانو له کنټرول څخه بهر دي، د نړیوالو اړیکو اصلي دروازه ده.
عدن د یمن د قانوني او په نړیواله کچه د پېژندل شوي حکومت د موقتې پلازمینې په توګه کار کوي. دا ښار پخوا هم څو ځلې د حوثیانو د بریدونو هدف ګرځېدلی دی.
له رسمي اعلان څخه مخکې، العربیه خبري شبکې په عدن کې د چاودنو د غږونو اورېدو ته په اشارې سره راپور ورکړی و چې لومړني راپورونه د حوثیانو له خوا په دوو توغندیو د عدن نړیوال هوايي ډګر د په نښه کولو کیسه کوي.
الحدث خبري شبکې هم په ورته راپور کې لیکلي وو چې د تهران ملاتړو حوثیانو د عدن نړیوال هوايي ډګر ځغاستلیکه په نښه کړې ده. دا برید کولی شي پر بشردوستانه عملیاتو او د ملکي وګړو پر تګ راتګ منفي اغېز وکړي.
سرچینه: رویټرز، العربیه، الحدث
🌐
