نن چهارشنبه د میزان په ۱۵مه، سهار د بدخشان ولایت په مرکز فیض اباد ښار کې د طالبانو د امنیه قومندانۍ سره نږدې چاودنه وشوه. د طالبانو حکومت دا پېښه تایید کړې ده.
په بدخشان کې د طالبانو د امنیه قومندانۍ د ویاند دفتر اعلان وکړ چې دا چاودنه په یوه ګلدان کې د ځای پر ځای شویو چاودیدونکو توکو له امله رامنځته شوې ده. د دغه بنسټ په وینا، د چاودنې هدف یو کرولا ډوله موټر و او په پایله کې یې دوه ملکي وګړي برسېرن ټپیان شوي دي.
طالب چارواکو د دې پېښې په تړاو د څلورو شکمنو کسانو د پېژندلو او نیولو خبر هم ورکړی دی. خو په بدخشان کې ځايي سرچینو رسنیو ته ویلي چې طالب ځواکونو د دې چاودنې په غبرګون کې تر ۴۰ ډېر کسان نیولي دي.
د ځايي سرچینو په وینا، دا پېښه د «پروژې څلورلارې» په سیمه کې رامنځته شوې ده؛ یو ځای چې ورځني کارګران معمولا د سهار له خوا د کار موندلو لپاره هلته راټولیږي. دې سرچینو زیاته کړه چې له چاودنې وروسته، طالب ځواکونو د خلکو د خورولو او پېښې ځای ته د هغوی د نږدې کېدو د مخنیوي لپاره هوايي ډزې وکړې.
دا چاودنه په داسې حال کې کیږي چې بدخشان ولایت په وروستیو ورځو او اونیو کې د څو نورو امنیتي پېښو شاهد هم و. د ځايي سرچینو د راپور له مخې، د یکشنبې په ورځ د میزان په ۱۲مه، د فیض اباد ښار په شپږمه ناحیه کې یو بمي موټرسایکل وچاودېد، چې د طالبانو د استخباراتو کارکوونکي یې په نښه کړل.
تر اوسه کومې ډلې د نننۍ چاودنې مسوولیت نه دی منلی. د افغانستان په شمال ختیځ کې بدخشان یو له هغو ولایتونو څخه دی چې د ملي مقاومت جبهې په ګډون د طالبانو ضد وسله والې ډلې په کې فعالیت لري او وخت په وخت له طالب ځواکونو سره نښتې کوي.
سرچینه: Zarin TV sources
🌐
