د سیمې اوسېدونکو ویلي چې نن پنجشنبه سهار وسله والو غلو د جلال اباد ښار اتمې ناحیې په دامان سيمه کې د سلطان نعيمي په نوم يو ځوان هټیوال وژلی دی. د عیني شاهدانو په وینا، ښاغلی نعیمي خپلې هټۍ ته پر لاره و چې برید پرې وشو.
د ځايي خلکو د لومړنیو راپورونو له مخې، غلو د دغه ځوان تر وژلو وروسته د هغه نغدې پیسې او موټرسایکل له ځانه سره وړي دي. دې پېښې د سیمې د کسبګرو او اوسېدونکو ترمنځ وېره او ترهه خپره کړې، چې په ښار کې د جنايي جرمونو له زیاتوالي شکایت کوي.
جلال اباد، د ننګرهار ولایت مرکز، په وروستیو میاشتو کې د وسله والو غلاوو، انسان تښتونو او نورو جنایي جرمونو د اندېښمنونکي زیاتوالي شاهد دی. د ښار اوسېدونکي د طالبانو له حکومت څخه غواړي چې د خلکو د سر او مال د خوندیتوب لپاره جدي اقدامات وکړي.
یوه ځایي اوسېدونکي چې نه یې غوښتل نوم یې واخیستل شي، رسنیو ته وویل: "هره ورځ موږ د یوې دردناکې پېښې شاهدان یو. امنیت نشته او غله په ازاده توګه ګرځي. موږ له امنیتي چارواکو غواړو چې دې وضعیت ته پاملرنه وکړي."
تراوسه په ننګرهار کې د طالبانو حکومت امنیتي چارواکو په رسمي توګه د دې پېښې او د عاملينو د نيولو لپاره د خپلو اقداماتو په اړه څه نه دي ويلي.
په افغانستان کې د طالبانو تر بیا واکمنېدو وروسته د بېوزلۍ او بېکارۍ زیاتوالی په ټول هېواد کې د جنايي جرمونو د زیاتوالي یو له اصلي لاملونو څخه ګڼل کېږي. ډیری ځوانان د ناهیلۍ او کاري فرصتونو د نشتوالي له امله له جرمي ډلو سره یوځای کېږي، چې دا د ټولنیز امنیت لپاره لویه ننګونه ده.
سرچینه: محلي راپورونه
🌐
