د کابل یو شمېر اوسېدونکي وايي چې د طالبانو د عدلیې وزیر عبدالحکیم شرعي، د دغه وزارت په ودانۍ کې دننه د یوه غیر رسمي زندان په کارولو سره، د امید سبز ښارګوټي اوسېدونکي مجبوروي چې د خپلو شخصي کورونو کرایه ورکړي او یا یې په زور پرېږدي. سرچینو د جمعې په ورځ، د تلې په ۱۷مه، ۸صبح ورځپاڼې ته ویلي چې دا اقدام په ځانګړې توګه په دې سیمه کې د شیعه مشرانو پر وړاندې شوی دی.
د دې راپور له مخې، په تېره یوه میاشت کې د کابل په لویدیځ کې د امید سبز ښارګوټي لسګونه اوسېدونکي د عدلیې وزارت ته له ورغوښتل کېدو وروسته، د «ډبرینې کوټې» په نوم په یوه زندان کې بندیان شوي دي. ویل کیږي هغه کسان چې د خپل کور د هرې کوټې لپاره د میاشتنۍ څلور زره افغانیو کرایې له ورکولو یا د کور له خالي کولو څخه سرغړونه کوي، په دې ځای کې زنداني کیږي او ځینې یې لا هم په بند کې دي.
دا په داسې حال کې ده چې امید سبز ښارګوټی یوه شخصي پروژه ده او اوسېدونکي یې قانوني ملکیت اسناد لري. د شخصي کورونو لپاره د کرایې ورکولو په اړه د طالبانو د عدلیې وزیر امر د دغې ډلې تر واکمنۍ لاندې په افغانستان کې د ملکیت حق د خوندیتوب په اړه جدي اندیښنې راپورته کړي دي.
پر دې سربېره، ۸صبح ورځپاڼې موندلې چې د طالبانو د عدلیې وزیر د امید سبز ښارګوټي ته نږدې، په سناتوریم سیمه کې لږ تر لږه ۷۲ کورونه د اصلي مالکینو له جبري ایستلو وروسته خپلو خپلوانو، ساتونکو او د کورنۍ غړو ته ورکړي دي. دا تورونه د ملکیتونو د غصب او له واک څخه د ناوړه ګټې اخیستنې یوه نمونه په ګوته کوي.
عبدالحکیم شرعي د طالبانو د مشر ملا هبت الله اخندزاده له نږدې کسانو څخه ګڼل کېږي. له دې وړاندې هم د هغه له خوا د عامو خلکو او د شیعه قومي مشرانو د سپکاوي، توهین او نیولو په اړه راپورونه خپاره شوي وو. دا کړنې د کابل په لویدیځ کې پر شیعه او هزاره ټولنې د سیستماتیک فشار یوه برخه ګڼل کېږي.
دغه قضیې د طالبانو په قضایي سیسټم کې د قانون د حاکمیت او عدالت په اړه جدي پوښتنې راپورته کوي. د ملکي شخړو د هواري او پر وګړو د فشار لپاره د غیر رسمي زندانونو کارول د بشري حقونو او د عدالت د لومړنیو اصولو ښکاره سرغړونه ده.
سرچینه: ۸صبح ورځپاڼه
🌐
